फेसबुकले हटायो किशोर-किशोरी माथिको बन्देज

विश्वको नम्बर वान सोसल नेटवर्किङ साइट फेसबुकले १८ वर्ष भन्दा मुनिका किशोर किशोरीका लागि फेसबुक प्रयोगमा लगाउँदै आएको सिमित बन्देज फुकुवा गरेको छ ।

यो बन्देज हटेसँगै अब सबै उमेरका किशोर किशोरीले अब आफैले आफ्नो फेसबुक पेजको सेटिङ परिवर्तन गर्न सक्नुका साथै विभिन्न जानकारी तथा सामाग्रीहरु सार्वजनिक रुपमा शेयर समेत गर्न पाउनेछन् । यसअघि सम्म १८ वर्ष मुनिका फेसबुक प्रयोगकर्ता किशोर किशोरीहरुले फेसबुकमा गरेका पोष्टहरु उनीहरुका साथी वा साथीका साथीले मात्र हेर्न पाउँथे तर साथीको वृत्त बाहिरका अरु प्रयोगकर्ताले हेर्न पाउँदैनथे ।



आफ्नो पछिल्लो परिवर्तनको बारेमा जानकारी गराउँदै फेसबुकले किशोर वर्ग सामाजिक संजाल प्रयोग गर्ने सबैभन्दा जानकार वर्ग रहेको र नागरिक सहभागिता, अभियान, विचार तथा अन्य चासोका विषयहरुमा आफ्ना मत पनि सबै मान्छेले हेर्न पाउन् भन्ने सोँच किशोर किशोरीमा हुने भएकाले यस्तो निर्णय गरेको बताएको छ ।

यद्यपि अहिले फेसबुकमा पब्लिक पोष्ट गर्ने किशोर किशोरीको संख्या उल्लेख्य नभएको भएपनि पछिल्लो परिवर्तनले किशोर किशोरीहरुमा छनोटको अवसरमा वृद्धि भएको र उनीहरुले आफ्ना सामाग्रीहरु सामाजिक संजालमा बढि भन्दा बढि शेयर गर्न सक्ने फेसबुकको दाबी छ ।

स्नाप च्याट, ह्वाट्स एप जस्ता नयाँ सोसल मिडियाहरु किशोर किशोरीबीच लोकप्रिय बन्दै गएपछि फेसबुकले यस्तो रणनीति अख्तियार गरेको हो ।

फेसबुकका अनुसार किशोर किशोरीले आफ्ना सामाग्रीहरु सार्वजनिक रुपमा फेसबुकमा पोष्ट गर्ने क्रममा केही पटक उनीहरुलाई ‘यो सामाग्री सबै जनाले हेर्न सक्छन् है’ भन्ने खालको सचेतनामूलक तथा जानकारीमूलक सन्देश दिइनेछ ।