निजी क्षेत्रका दूर सञ्चार सेवा प्रदायक कम्पनीहरु युनाइटेड टेलिकम लिमिटेड (यूटीएल) र स्मार्ट टेलिकमले ६० लाख मोबाइल फोन वितरण गर्ने भएका छन् ।
३०/३० लाख जीएसएम मोबाइल लाइन वितरण गर्ने ती कम्पनीको पूर्व योजना सर्वोच्च अदालतले गत साता गरेको एक फैसलाबाट कार्यान्वयनमा आउने भएको हो । दुई कम्पनीलाई एकीकृत लाइसेन्स दिने सरकारी निर्णयविरुद्ध परेको मुद्दा सर्वोच्च अदालतले खारेज गरिदिएको छ ।
सीमित सेवाको लाइसेन्स पाएका कम्पनीलाई नेपाल दूर सञ्चार प्राधिकरणले एकीकृत लाइसेन्स दिने निर्णय गरेको थियो । यूटीएल र स्मार्ट टेलिकमले एकीकृत लाइसेन्स लिई सेवा विस्तारको योजना नियामक निकायमा पेश गरेका थिए ।
नेपाल दूर संचार प्राधिकरणले स्मार्टलाई एकीकृत लाइसेन्स दिइसकेको थियो भने यूटीएललाई पनि दिने निर्णय गरेर जारी गर्न बाँकी रहेको थियो । अदालतमा प्राधिकरणविरुद्ध मुद्दा दायर भएपछि योजना अलपत्र परेको थियो ।
सर्वोच्च अदातलले गत साता एकीकृत दूरसञ्चार अनुमतिपत्रका विषयमा परेका सात मुद्दा खारेज गरेको हो । सर्वोच्चको फैसलापछि कम्पनीहरुलाई लगानी र नेटवर्क विस्तारमा रहेका बाधा हटेका छन् । सर्वोच्चको फैसलाले दूरसञ्चार प्राधिकरणमा बाधा अड्काउ फुकाउमार्फत् गठन भएको बोर्डलाई पनि वैधता दिएको छ ।
दुई कम्पनीले प्राधिकरणसमक्ष एकीकृत लाइसेन्सको अनुमति माग्दा पहिलो चरणमा ३०-३० लाख जीएसएम लाइन विस्तार गर्ने प्रस्ताव गरेका थिए । सन् २०१४ सम्ममा पहिलो चरणको विस्तार सम्पन्न हुने कम्पनीहरुले बताएका थिए ।
एकीकृत दूरसञ्चार अनुमतिपत्र पाइसकेको स्मार्टले पहिलो चरणमा राजधानीसहित सहरी क्षेत्रमा जिएसएम मोबाइल सेवा विस्तारको काम गर्नेछ । उपकरण आयात, पूर्वाधार निर्माणलगायत काम सम्पन्न गर्न तीन महिना लाग्ने कम्पनीले जनाएको छ ।
अब यी कम्पनीले ल्यान्ड लाइन, सिडिएमए, जिएसएम मोबाइल, डाटा सेवा तथा अन्तर्राष्ट्रिय गेटवे सेवा बिक्री गर्न सक्नेछन् । त्यसमध्ये स्मार्टले चार महिनाभित्र सहरी क्षेत्रमा जिएसएम मोबाइल सेवा सुरु गर्ने बताएको छ । मोबाइल सेवा सुरु गरेर ३० लाख लाइन वितरण गर्न देशभर १ हजार ८ सयवटा बेस ट्रान्सिभर स्टेसन -बिटिएस) बनाउने उसको योजना छ ।
स्मार्टले सेवा विस्तारका लागि करिब ३० अर्ब थप लगानी गर्ने घोषणा गरेको छ । त्यसमध्ये प्रारम्भिक लगानी करिब ७ अर्बको हुनेछ । स्मार्टले उद्योग विभागबाट आफ्नो पुँजी १ अर्ब ५९ करोड ६० हजारबाट बढाएर ८ अर्ब ९८ करोड ४६ लाख १० हजार पुर्याउन स्वीकृति लिएको छ । लगानी विस्तारका लागि बेलायतको स्क्वायर स्टार इन्कबाट करिब ८ करोड अमेरिकी डलर ऋण सम्झौता गरिसकेको कम्पनीले जनाएको छ ।
स्मार्ट टेलिकमकको ग्राहक संख्या अहिले ७ लाख ५३ हजार २ सय ५४ रहेको छ । स्मार्टमा २० प्रतिशत स्वदेशी र ८० प्रतिशत विदेशी लगानी रहेको छ । यसमा लाल साहु डिस्टि्रब्युसन प्रालि सिंगापुरको ७० प्रतिशत, जिल्याट स्याटलाइट नेटवर्क लिमिटेडको १० प्रतिशत र स्क्वायर नेपाल प्रालिको २० प्रतिशत स्वामित्व रहेको छ ।
कम्पनीले पूर्वाञ्चलबाहेकका ३ सय ९८ गाविसमा कम्तिमा दुई लाइन टेलिफोन सेवा विस्तार गर्ने सर्तमा अनुमति पाएको थियो । हाल कम्पनीले ४० जिल्लाका ग्रामीण क्षेत्रमा सेवा सञ्चालन गरिरहेको छ ।
त्यस्तै, भारतीय सरकारी दूरसञ्चार कम्पनीको प्रमुख लगानी रहेको यूटीएललाई एकीकृत अनुमतिपत्र दिने निर्णय प्राधिकरणले गरे पनि कम्पनीले लाइसेन्स भने पाइसकेको छैन । लाइसेन्स हात पारेपछि यूटीएलले पहिलो चरणमा आठ सीडीएमए बीटीएस र ५ सय जीएसएम बीटीएस स्थापना गर्ने योजनामा बनाएको छ ।
यूटीएलले दोस्रो चरणमा थप ५ सय बीटीएस निर्माण गर्ने बताएको छ । उसले यो काम सन् २०१४ मे ६ भित्र सक्ने बताएको थियो । तर मुद्दाको कारण योजना अवधि पछि सर्ने भएको छ । यूटीएलले १० अर्ब लगानी थप गर्ने बताइसकेको छ । हाल यूटीएलका ७ लाख १९ हजार ३ सय ४१ प्रयोगकर्ता रहेका छन् ।
दुई कम्पनीले मोबाइल लाइन विस्तार गरेपछि अहिले तीव्र प्रतिस्पर्धामा रहेका नेपाल टेलिकम र एनसेललाई थप प्रतिस्पर्धाको सामना गर्नुपर्ने देखिन्छ । नेपाल टेलिकमले थप ५० लाख जीएसएम मोबाइल विस्तारको तयारीलाई तीव्रता दिइसकेको छ ।
- See more at: http://www.onlinekhabar.com/2013/09/118748/#sthash.eYJwPb8L.eG4jYezg.dpuf
7:19 AM
